ზაფხულის ღამეები ბათუმში: სპონტანური გადაწყვეტილებების ხიბლი

აღმოჩნდა, რომ სამყაროს სულ სხვა გეგმები ჰქონდა ჩემს თბილისში დარჩენასთან დაკავშირებით. ერთი სპონტანური გადაწყვეტილება საკმარისი აღმოჩნდა, რომ მეგობრებთან ერთად რამდენიმე დღით ბათუმში წასასვლელად მზადება დამეწყო. ბოლოს და ბოლოს, სპონტანურობა ხომ ურბანული ცხოვრების წესია? ბოლო წუთას შეცვლილი გეგმების მღელვარება და სასიამოვნო მოლოდინი ცხოვრებას ამრავალფეროვნებს და მოულოდნელი სიხარულით სავსეს ხდის.

მოგზაურობა თბილისიდან ბათუმამდე მატარებლის თავგადასავლით დაიწყო. ნოსტალგიამ ბავშვობაში დამაბრუნა და ის გრძნობები გამიცოცხლა, ზღვაზე მიმავალ მღელვარე ბავშვებს მთელი გზა მოსვენებას რომ არ გვაძლევდა. გამახსენდა ჯერ კიდევ არ დაწყებული ერთ თვიანი საზღვაო არდადეგების სიხარული და მშობლების უკვე დაღლილი სახეები. მატარებლით მოგზაურობა თავისთავად გახდა თავგადასავლის საწყისი - რამდენიმე დღის დასვენებისთვის აუცილებელი ნივთებით, ურბანული სტილის ჩანთებით, ქუდებით და სათვალეებით აღჭურვილი თანამგზავრებით.  

მგზავრობისას მე და ჩემმა მეგობარმა ჩვენი ექსპერიმენტი გავიხსენეთ. ამჯერად გადაწყდა თანამგზავრების შესახებ ისტორიები აქსესუარების მიხედვით გამოგვეგონებინა. ვაგონის ბოლოს ბოჰოს სტილის ქუდით და დიდი ზომის სათვალეებით წარმოდგენილი ქალბატონი მწერალი უნდა ყოფილიყო, რომელიც შთაგონებას ზღვის სანაპიროზე ეძებდა; მგზავრი ვინტაჟური ტყავის ზურგჩანთით და ამ ზურგჩანთაზე მიმაგრებული მინანქრის ქინძისთავების კოლექციით, მოგზაურობის მდიდარი ისტორის მქონე თავგადასავლების მოყვარული იქნებოდა. ჩვენმა ვარაუდებმა და კამათმა მალევე ჩაითრია სხვა მგზავრებიც და ახლა უკვე ყველა ერთად ვაკერებდით ერთმანეთს იარლიყებს, რამაც მოგზაურობა კიდევ უფრო დასამახსოვრებელი და განსაკუთრებული გახადა.

ზოგადად სპონტანური მოგზაურობისთვის მზადება მრავალფეროვნებას, თუმცა პრაქტიკულობასაც მოითხოვს. ასეთი მოგზაურობების დროს ურბანული სტილის ჩანთები სავალდებულოა — მოსახერხებელი და ამავდროულად მოდური. ზურგჩანთა აუცილებელია, რომ ქალაქის ქუჩების შესასწავლად ხელი არ შეგეშალოს, შედარებით დიდი ნაჭრის ჩანთები კი იდეალურია სანაპიროზე დღის გასატარებლად. ქუდი კიდევ ერთი აუცილებელი ელემენტია, რომელიც მზისგანაც გვიცავს და თავისი ხასიათიც შემოაქვს ნებისმიერ ლუქში და რა თქმა უნდა სათვალე, როგორც ზაფხულის განუყოფელი ნაწილი.

 ბათუმი, თავისი განსაცვიფრებელი ზღვისპირა ხედებით და თვალწარმტაცი მზის ჩასვლით, თითქოს მეძახდა. ამ ქალაქს თანამედროვე და ტრადიციული არქიტექტურის ნაზავი უნიკალურ ხიბლს მატებს, რაც მას სრულყოფილად აქცევს და შესანიშნავ თავშესაფარს წარმოადგენს თბილისის აურზაურისა და სიგიჟისგან გასაქცევად. ბათუმის ქუჩებში ხეტიალმა, პლაჟების მოკვლევამ და ცოცხალი ღამის ცხოვრებით გაჟღენთვამ მადლიერების გრძნობით ამავსო იმ სპონტანური გადაწყვეტილების გამო, რომელმაც აქ მომიყვანა. ყოველი წამი ახალი თავგადასავალი და ახალი ამბავია. ჰორიზონტის ქვემოთ მზის ჩასვლის ყურებიდან დაწყებული, ღამის სანაპიროზე ბარში ცეკვით დამთავრებული, ყოველი გამოცდილება შეხსენება იყო იმის შესახებ, რომ მომენტში ცხოვრება მშვენიერია.

ზაფხულის ღამეები ბათუმში დაუვიწყარი გამოდგა. ამ სპონტანურმა მოგზაურობამ კიდევ ერთი თავი შემატა ჩემს აღმოჩენებს. ეს მოგზაურობა გახდა დასტური მოულოდნელის სიხარულის - როცა იაზრებ, რომ ცხოვრებამ ნებისმიერ მომენტში შეიძლება დაუგეგმავ თავგადასავალში წაგიყვანოს. მე კი კვლავ ვაგრძელებ ახალი ადგილებისა და კულტურების შესწავლას და ველოდები იმ ისტორიებში მონაწილეობის მიღებას, რომლებიც ჯერ კიდევ არ დაწერილა; მჯერა, რომ თითოეული მათგანი ჩემი მუდმივად განვითარებადი სტილის და სულისკვეთების ანარეკლი გახდება.